کیچیک بیر تورک دونیاسیدیر بیزیم اورمو

 یارپاق هفته لییی ۱۳۸۴ - علیرضا قولونجو

آذربایجان گؤزلدیر. بو سؤزون ان اعتیبارلی تانیغی(شاهیدی) ائله بیزیم اورمودور. هه­یه اورمو؛ زنگین اعجازلی تورپاغی، یاشیل- مئیوه­لی باغلاری، تمیزهاواسی، گزمه­لی-دولانمالی یئرلری، سئحیرلی- دوزلو گؤلو، اوزومو، دوشابی، نوغولو ایله…خاریق العاده توریزم جاذیبه­لری ایله تاماشاچیسینی حیرتلندیرن، شاشیردان اورمو.

اسکی تورک بویلاری، تورک طایفالرینین آدینا بیزیم اورمونون کندلری آدی اولاراق راست گلیریک، بورادا چئشیتلی تورک لهجه­لری دانیشیلیر، آذربایجان، آنادولو و تورکمن آشیق صنعتلرینین  اؤزه­للیکلری، اورمو آشیق مکتبینده گؤرونمکده­دیر، بورادا موسلمان تورکون شیعه­سی، سوننوسو، اهلی- حقی یاشاییر. کیچیک بیر تورک دونیاسیدیر بیزیم اورمو.

 

بیزیم اورمونو قوروماق، اونو ائله اؤزوموز کیمی دئییل اؤزوموزو فدا ائتمکله قوروماق، اورمودان موغایات اولماق، اوندان گؤز به­به­ییمیز کیمی موغایات اولماق، اونو حیفظ ائتمک، آذربایجانیمیزین- وطنیمیزین گؤزللیکلرینی، تورک دونیاسینین اؤزه­للیکلرینی تمثیل ائدن اورمویا، آذربایجانین ایستانبولو اولان اورمویا بورجوموزدور. بو تورپاغین اوغروندا شهید دوشن، میلی موجادیله­میز یولوندا بو تورپاغی آل قانلاری ایله سوواران یوزلر شهیده بورجوموزدور. بورجوموزو اؤده­مه­لیییک، وطنه، آذربایجان میلتینه، محمد ­امین آزاد وطن­لره، ابراهیم صابونچولارا، مییاوالی عبدالرحمان­لارا، دوکتور ذوالفقاری­لره و …

 

اورمودا، اورمیه­ده آذربایجان تورک وارلیغینی عکس ائتدیرن هر نه­یی دونیا اجتماعیاتینین گؤز اؤنونه سرگیله­مه­لیییک. بونو یاپماق اوچون باشقالارینی اینکار ائتمکدنسه اؤزوموزو ایثباتلاماق ان گئرچک و ان گووه­نلی یولدور، دئیه اینانیرام.

یاشاسین آزربایجان

 

نوشته شده در تاریخ پنجشنبه 24 دی 1388    | توسط: ائلمان ارسوی    |    | نظرات()